दोधारा चाँदनी । कञ्चनपुरको दोधारा चाँदनी नगरपालिका-१ स्थित फोरलेन पुलमा अटो र मोटरसाइकल एक आपसमा ठोक्किँदा एकै परिवारका आमा-छोरीसहित घाइते भएका छन्।

महेन्द्रनगरबाट दोधारा चाँदनीतर्फ आउँदै गरेको सु.प.प्र. ०२००१ ह १६६९९ नम्बरको अटो र विपरीत दिशाबाट जाँदै गरेको मोटरसाइकल एकआपसमा ठोक्किएर दुर्घटना भएको इलाका प्रहरी कार्यालय दोधारा चाँदनीले जनाएको छ।

दुर्घटनामा परी डडेलधुराको आलिताल गाउँपालिका वडा नं. ८ डोलो बस्तीका २६ वर्षीया ललिता सारु मगर र उनकी १२ महिनाकी छोरी मेघना सारु मगर घाइते भएका छन्। दुर्घटनामा छोरी मेघनाको पेट, बायाँ गाला र छातीमा चोट लागेको छ भने आमा ललिताको पेटको बाहिरी भागमा चोट लागेको छ। साथै, ललिताका छोरालाई पनि चोट लागेको छ।

दुर्घटना लगत्तै घाइतेहरूलाई दोधारा चाँदनी नगर अस्पतालमा प्राथमिक उपचार पश्चात् थप उपचारका लागि महाकाली प्रादेशिक अस्पताल रेफर गरिएको छ।

दुर्घटना पछि फरार रहेको मोटरसाइकलको खोजी कार्य तीव्र पारिएको र घटनाबारे थप अनुसन्धान भइरहेको इलाका प्रहरी कार्यालय दोधारा चाँदनीले जनाएको छ।